Hey,
Takk fyri brævið. Tað, tú sigur frá, eru veruliga tungar og ógreiðar kenslur, og tað krevur dirvi at seta orð á hetta. Tað ljóðar sum tú gongur við nógvum ótryggleika og óvissu um teg sjálva/n, og eg skilji væl, at tú ert troytt/ur av tí.
Tú spyrt, um hetta kann hava samband við autismu. Ja, tað er sera vanligt, at ung við autismu uppliva júst hetta at verða tyngd av kenslum, hava trupulleikar við at seta orð á, kenna seg óklára/n og missa yvirlitið. Serliga tá nógv fer fram, ella tá fólk rundan um teg ikki heilt skilja, hvat tú hevur brúk fyri. Tað, at tú hevur fingið diagnosu seint, kann eisini gera, at tú hevur gingið leingi og roynt at klára alt einsamøll/mallur, og tað blívur mann troyttur av.
Eg lesi millum linjurnar, at tú kennir teg eitt sindur einsamalla/n. Tí vil eg siga, at tú hevur rætt til at fáa hjálp og at verða tikin í álvara. Tað, at tíni foreldur ikki skilja tað so væl enn, merkir als ikki, at tín uppliving er skeiv. Tað merkir heldur, at tey eisini hava brúk fyri at læra meira.
Eg vil ráða tær til at tosa við ein vaksnan, tú hevur álit á. Tað kann vera ein lærari, heilsufrøðingurin í skúlanum, onkur vaksin í familjuni, ella onkur annar, tú kennir teg trygga/n við. Tú kanst eisini ringja til Tú & Eg Ráðgevingina á 116111 gerandisdagar kl. 18–22, har tú kanst tosa við onkran, sum dugir at lurta og kann hjálpa tær við tonkunum.
Eg vil at enda siga, at tað ER møguligt at fáa tað betri. Tú ert longu væl á veg, tí tú setir orð á, hvat er torført. Og tú skalt ikki standa einsamøll/mallur við hesum. Tað eru fólk, sum kunnu, og vilja, hjálpa tær víðari.
Alt tað besta,
Herborg