Góða tú, sum ivast.
Takk fyri brævið. Tað er altíð deiligt at fáa rós fyri heimasíðuna.
Eg fari at taka tað seinasta fyrst: Tú spyrt hvat er galið við tær, tí tú verður tiltrekt av pervarum. Tað er absolutt einki galið við tær!! Í tykkara aldri er tað sera vanligt at vera forvitin um sex, og upptikin av tí. Dreingir eru ofta opnir um tað, og tosa nógv um sex, men gentur eru nokk ikki minni forvitnar um tað, sjálvt um tær kanska tosa minni um tað. So tú hevur sikkurt rætt í, at tú veitst líka nógv sum teir um sex. So tað skalt tú ikki vera kedd av, hasir báðir ljóða sum tveir fittir og heilt vanligir dreingir J.
Hvønn tú skalt velja av hesum báðum deingjunum, er ilt at siga. Tað er faktiskt bara tú sjálv, sum kanst avgera tað. Kanska tú bara skalt geva tær tíð at finna útav, hvør av teimum er meira áhugaverdur í longdini. Um tú ert hægri ella lægri enn drongurin, hevur einki at siga um, hvussu tit rigga saman.
Tú sigur eisini at tú ikki dugir at vísa, at tær dámar drongin. Tað ger man bara við at vísa, at man tímir at vera saman við honum, og at práta við hann. Vera glað og smílandi. Soleiðis sært tú eisini á dreinginum, um honum dámar teg.
Vinarliga
Tú & Eg Ráðgevingin
