Góða genta
Takk fyri brævið! Tað er gott, at tú skrivar til okkara um tínar trupulleikar við mammu tíni. Vit halda als ikki, at tú ert “ekstra følsom”, sum tú sjálv ert bangin fyri. Vit skilja, at tað er torført hjá tær at siga frá, og at tú følir, at tað verur ikki lurtað eftir tær.
Tá mann gerst tannáringur, vil mann ofta ikki at vera so nógv saman við foreldrum longur. Tá eru tað ofta onnur ting, sum fylla meira, eitt nú skúli, vinir, frítíðarítriv og mangt annað. Soleiðis ljóðar tað eisini, at verða fyri teg. Serliga, tí tú skrivar, at tú fyrr var bangin fyri at sova úti, men nú er vaksin frá tí. Kanska er mamma tín ikki vaksin líka skjótt frá tí, sum tú ert.
Tí kann hjálpin, sum mamma tín gevur tær, í dag bara kennist sum at mamma tín blandar seg ov nógv.
Tú gert greitt, at tú vil hava meira pláss og frírúm, tað er sjálvandi heilt ok. Men veitst tú av, at mamma tín hevur ábyrgdina og rætt til at uppala teg, soleiðis sum hon sjálv heldur vera best? Hon hevur eisini ábyrgdina av at ansa væl eftir tær. Tað ljóðar sum, at mamma tín roynir alt hon kann, at ansa væl eftir tær og vil tryggja, at tú hevur tað gott. Tað er deiligt.
Men tað er týdningarmikið at finna javnvágina í millum títt privatlív og leiklutin hjá mammu tíni. Mamma tín hevur ábyrgdina av tær, men hon skal eisini virða tíni mørk. Visti tú av at tað stendur í Barnarættindasáttmálanum at tú hevur rætt til eitt privatlív, eisini har tú býrt?
Vit halda, at tú dugir væl at greiða frá tínari støðu í brævinum. Tú dugir væl at greiða frá, hvussu tað kennist fyri teg, tá mamma tín blandar seg ov nógv. Viðhvørt er tað soleiðis, at foreldur mugu fáa okkurt at vita fleiri ferðir, áðrenn tey skilja tað. So kanska kundi tað verið ein møguleiki hjá tær at tosa við hana aftur? Kanska tú kundi víst henni brævið, tú hevur skriva til okkara saman við svarinum frá okkum? Torir tú tað?
Um tú følir, at mamma tín ikki lurtar eftir tær, halda vit, at tú kundi tosa við ein lærara, um hvussu tú hevur tað? Kanska lærarin kundi ringt til mammu tína og tosa við hana, um at geva tær eitt sindur meira luft og frírúm.
Tú ert eisini vælkomin at ringja til okkara á tlf. 116 111, um tú vil práta meira. Tað er ókeypis at ringja, og tú ert dulnevnd.
Alt tað besta,
Tú & Eg Ráðgevingin
