Góða genta 15 ár!
Takk fyri brævið!
Tað er vanligt at vera forvirrað, tá man er 15 ár.
Tú ert á veg at gerast vaksin. Tað kynsliga byrjar at fylla í tonkunum. Tú fært kynsligar hugsanir um hitt kynið, og av og á eisini um títt egna kyn.
Um tú ert biseksuell ella ikki, er ov tíðliga at siga. Og tað er heldur eingin annar sum kann fortelja tær um tú ert biseksuell ella ikki. Tú kanst ikki gera annað enn at geva tær tíð til at finna útav hesum sjálv. Tað er umráðandi, at tú gevur tær tíð til at merkja eftir, hvussu tú hevur tað tá tú ert saman við gentum, og tá tú ert saman við dreingjum. Og tú nýtist ikki skunda tær heldur. Gev tær bara góða tíð til at finna útav, um tú ert biseksuell ella ikki. Hjá summum tekur tað fleiri ár at finna útav.
Tað er eisini umráðandi , at tú ert erlig og trúgv ímóti tær sjálvari, og at tú hugsar teg væl um, hvat tú følir er rætt fyri teg og hvat ikki er rætt fyri teg, so at tú sjálv kanst seta tíni mørk.
Ring 116 111 til Tú & Eg Ráðgevingina, ella skriva aftur, um tú hevur tørv á tí!
Vinarliga
Tú & Eg Ráðgevingin.
