Hey!
Vit her í ráðgevingini eru sera glað um, at tú heldur at brævkassin er super. Tú ert hørm um, at ein vinkona spottar onkra aðra vinkonu og tað roynir tú at fyribyrgja, við at siga tað við vinkonuna sum spottar, og tað er gott. Vinkonan sum spottar tekur tað nær og tað er heilt nattúrlig og vanligt. Orsøkin til at hon flippar so út er ivaleyst at hon kennir seg rakta. Óivað veit hon innast inni væl, at tað er skeivt at spotta sínar vinkonur, men kanska kann hon ikki lata vera, tí at hon hevur brúk fyri at hevja seg sjálva. Eg skilji brævið soleiðis, at tú faktisk dámar hesa vinkonuna rættuliga væl hóast alt, og tit ganga eisini í flokki saman. Nú komi eg við einum ráði sum tú møguliga heldur vera løgið og strævið: Royn tú í nakrar vikur at rósa vinkonuni sum spottar. Royn at fáa hana at kenna seg væl, soleiðis at hon verður glaðari fyri seg sjálva. Royn at gera tað til vana hjá tykkum øllum, at vera góð við hvørja aðra og royn at at venda negativum samtalum til okkurt positivt og stuttligt.
Góða vinkona, eg veit at eg nú gav tær eina ordans uppgávu, men tað er eisini upp til tín, um tú vilt fylgja hesum ráði. Mest av øllum ynski eg at tú ikki heldur, at tú hevur skyldina av at vinkonan ger sum hon ger. Um tú ikki heldur at hetta svarið er gott, kanst tú altíð skriva aftur til okkara.
Vinaliga
Tú & Eg Ráðgevingin
