Góða tú, ið ert um at bresta!
Tað at tú ert um at bresta, er tekin um, at tú hevur stóran tørv á at fáa sett orð á, hvat hendi og hvat tað hevur gjørt við teg og tínar kenslur. Tú dugir sera væl at greiða frá, hvussu tað hevur ávirkað teg, og hvat fyri stúranir, ið tú hevur, nú tú veitst, at tú hevur trupult við nærleika í tínum kærleikslívi. Tað er nakað, sum hendir ofta fyri fólk, ið hava verið fyri kynsligum ágangi sum børn, og tí er tað sera umráðandi, at tú søkir tær hjálp nú, jú fyrr jú betur. Tínir spurningar og tað,sum tú greiðir frá, er als ikki býtt at seta orð á. Tey fólk, ið viðgera børn og ung, ið hava verið fyri kynsligum ágangi, eru von við at hoyra líknandi útsagnir, so tað skalt tú ikki stúra fyri.
Tá tú ert 17 ár, kanst tú venda tær til barnaverndartænastuna í tínum øki og greiða tínum málsviðgera frá, hvat er hent og at tú hevur brúk fyri at fáa samrøður við ein viðgera, ið kann hjálpa tær. Tað kann vera ein sálarfrøðingur ella annar serfrøðingur innan viðgerð av kynsligum ágangi. Um tú ikki vilt hava, at tíni foreldur fáa at vita, hvat tað snýr seg um, kanst tú siga tað við málsviðgeran. Tá talan er um kynsligan ágang, verður nærmasta familjan ikki altíð kunnað um alt, netupp tí, at kynsligi ágangurin er framdur av einum av tínum nærmastu, í hesum føri títt systkinabarn. Tað besta vildi verið at hann eisini hevði fingið fingið viðgerð, hóast hann nú er blivin ein vaksin maður og ikki er undir barnavernd meira. Tað at hann hevur havt ein kynsliga skemmandi atburð tá, kann merkja, at hann enn hevur tað, og tað er rættiliga álvarsligt, um hann eisini ger seg kynsliga inn á børn í dag. Kynsligur ágangur móti børnum skal steðgast í so stóran mun sum gjørligt og tað gerst m.a. við, at tann, sum ger tað, verður steðgaður. Tað verður gjørt, tá børn verða vard ímóti tí, bæði við at gerast betri at seta mørk, at hava vaksin hjá sær, ið verja ein og tá boðað verður frá til myndugleikarnar.
Men aftur til tín, tí hetta snýr seg um, hvussu tú fært bestu hjálp sum til ber. Tú kanst venda tær til barnaverndartænastuna, har tú kanst fáa ókeypis ráðgeving og hjálp, tí tú ert undir 18 ár og tey saman við tínum foreldrum hava ábyrgd av tínum trivnaði. Ein annar møguleiki er, at tú sjálv søkir tær sálarfrøðiliga hjálp ella aðra hjálp, t.d. frá viðgerum innan kynsligan ágang. Tann hjálpin, ið tú søkir tær uttanum barnaverndina kostar í flestu førum. Far inn á www.bvs.fo og kanna, hvørja hjálp, ið tú hevur rætt til at fáa. Tú kanst altíð kjatta við ein ráðgeva á Barnabati.fo Tað kann vera okkurt,ið tú vilt hava svar uppá beinanvegin, og tá er gott at kjatta , ella kanst tú ringja og tosa við ein ráðgeva.
Blíðar heilsur
Tú & Eg Ráðgevingin
